Складаецца з Петрапаўлаўскага сабора (зараз касцёл Св.апосталаў Пятра і Паўла) і жылога корпуса кляштара (захаваліся заходняе і часткова ўсходняе крылы будынка), абнесенага агароджай (частка якой захавалася з 2-ой паловы 18 ст.). 

Кляштар аддзелены ад вуліцы насыпам, які меў абарончае значэнне.  Двухпавярховы будынак утвараў прамавугольны ў плане ўнутраны двор, па перыметры якога з трох бакоў праходзіў калідор, злучаны з апсідай. 

Касцёл - трохнефавы двухвежавы храм, ўзведзены мсціслаўскім ваяводам Мікалаем Кішкам у 1-й палове 16ст.. Пластыка фасадаў простая і строгая. Галоўны алтар мураваны, двух'ярусны, раскрапаваны калонамі і пілястрамі, размаляваны пад мармур, завершаны шырокім карнізным поясам з лучковым франтонам. У алтарных праёмах размешчаны скульптуры св. Пятра і Паўла, у цэнтры - "Распяцце".