Адпраўлена!

Памылка!

Ансамбль царквы Раства Багародзіцы: царква (фрэскі ў інтэр'еры царквы), званіца, царкоўна-прыходская школа, падмуркі цёплай царквы, былы жылы дом, рэшткі былога жылога дома

Цiкавае

Ансамбль царквы Раства Багародзіцы: царква (фрэскі ў інтэр'еры царквы), званіца, царкоўна-прыходская школа пажмуркі цёплай царквы былы жылы дом рэшткі былога жылога дома

Змест

Звесткі аб каштоўнасці

Шыфр

512Г000519

Катэгорыя каштоўнасці

аб'екты нацыянальнага значэння

Глава

Матэрыяльныя нерухомыя каштоўнасці

Тып каштоўнасці

Помнiк архiтэктуры Г

Падтып каштоўнасці

Помнiк культавай архiтэктуры

Месца знаходжання

Магілёўская вобласць, Слаўгарадскі раён, г. Слаўгарад, вул. Ленінская, 9; вул. Ленінская, 9/1

Датаванне

1791 - 1793 гг.

Стыль

Класіцызм

Апісанне

Ансамбль царквы Раства Багародзiцы ў г. Слаўгарадзе - адзiн з самых дасканалых узораў архiтэктуры класiцызму ў Беларусi.

Царква са званiцай пабудавана ў 1791-1793 гг. па загаду уладальнiка Прапойска князя А.М. Галiцына, вядомага дзяржаўнага дзеяча i дыпламата, мецэната мастакоў i вучоных. Царква знаходзiцца на самай высокай кропцы горада i ўзвышаецца над ім больш чым на 30 м. Будаўніцтва царквы вялося пад кiраўнiцтвам дасведчанага дойлiда "муляра Лукi Iванова", на будаўнiцтве працавалi прыгонныя сяляне Галiцына. Усе будаўнiчыя матэрыялы былі мясцовыя, толькi дахавае жалеза было прывезена з Масквы.

Па меркаванню шэрага даследчыкаў, аўтарства праекта царквы належыць рускаму архiтэктару М. Львову. На карысць гэтага сведчыць тое, што М.А. Львоў у складзе свiты Кацярыны II падчас яе падарожжа на поўдзень у 1787 г. наведаў Прапойск, i тое, што Львоў быў асабiста знаёмы з уладальнiкам мястэчка князем А.М. Галiцыным. Акрамя таго, маецца шмат падабенстваў паміж храмам у Прапойску з iншымi творамi дойлiда - царквой у Арпачове Наваторжскага павета (1783), Барысаглебскiм саборам у Таржку (1785), Калыванскай царквой (1780-я гг.), царквой у Прамухiне i iнш.

У кан. XVIII ст. (цi, больш верагодна, у пач. ХІХ ст.) царква была распісана невядомымi мастакамі ў стылi ранняга класiцызму. Iснуе меркаванне, што група жывапiсцаў была прыслана Галiцыным з Pacii. Роспiсы вызначаюцца высокiм майстэрствам кампазiцыi, малюнка i каларыту, а таксама незвычайна шырокай iканаграфiчнай праграмай з 57 сюжэтаў на евангельскiя тэмы.

У сярэдзiне 1970-х гг. фрэскі былi ўпершыню даследаваны i сфатаграфаваны экспедыцыяй Iнстытута мастацтваў i фальклору Акадэмii навук Беларусi.

У савецкія часы царква была закрыта і выкарыстоўвалася ў якасці гандлёвага склада. У 1989 г. была вернута вернікам. На працягу 2000-х гг. у будынках ансамбля вялiся рамонтныя работы рознага кшталту, якiя не скончаны да сённяшняга дня.