Сабор уяўлае сабой крыжовы ў плане дзевяцiкупальны трохапсiдны храм. Цэнтральны кубападобны двух'ярусны аб'ём завершаны чатырохсхiльным дахам з цылiндрычным светлавым барабанам i цыбулепадобным купалам. Па вуглах даху размешчаны меншыя глухія цыліндрычныя барабаны з купаламi. Над апсідай і бакавымі прыдзеламі знаходзяцца аналагічныя барабаны з галоўкамі. Фасады члянёны арачнымі і ў бакавых прыдзелах прамавугольнымі аконнымі праёмамі. Пластыка фасадаў вельмі выразная, насычаная дэкаратыўнымі элементамі стылізаванымі пад формы маскоўскага царкоўнага дойлідства 17 ст.