Брацкая магiла

У брацкай магіле пахаваны 175 партызан і чырвонаармейцаў, што загінулі ў перыяд з 1942 па 1944 год у баях з нямецка-фашысцкімі захопнікамі. Вядомы імёны толькі пяці воінаў і партызан. На поўначы Глускага раёна і сумежнай тэрыторыі Асіповіцкага раёна дзейнічала 161-я партызанская брыгада імя Катоўскага. Баявыя аперацыі на “Варшаўцы” (шашы Масква — Варшава) праводзілі таксама атрады іншых партызанскіх злучэнняў Глускага раёна. Нямецкія захопнікі неаднаразова арганізоўвалі карныя аперацыі супраць партызан і мірнага насельніцтва, у выніку каторых былі спалены разам з жыхарамі і зараз не існуюць вёскі Паршчаха, Белыя, Восы, Каляосы, Масты і Тоўсты Лес. У магіле захоўваюцца астанкі партызан 161-й брыгады імя Катоўскага, што загінулі ў гэтых баях. Малодшы сяржант Луцкі Рыгор Клімавіч 1918 года нараджэння, ураджэнец вёскі Рудня Глускага раёна, партызан атрада А. С. Шатуры загінуў 27 красавіка 1942 года. Радавы Савіч Пётр Мітрафанавіч 1902 года нараджэння, ураджэнец вёскі Сіманавічы, партызан атрада імя Дзяржынскага загінуў 17 ліпеня 1943 года. Радавы Дэктар Міхаіл Іванавіч загінуў 6 сакавіка 1944 года.