Будынак

Раён вул. Маскоўскай пачаў забудоўвацца ў апошняй трэці 19 - пачатку 20 ст. У той час забудова тут была пераважна драўляная. На вул. Маскоўскай і прылеглых да яе вуліцах у асноўным сяліліся служачыя і рабочыя чыгункі. У 1930-я гады на вул. Маскоўскай былі пабудаваны шматкватэрныя жылыя дамы (№ 10, 16), лазня (№7а), вытворчы корпус завода медпрэпаратаў, якія захаваліся да нашага часу. Чатырохпавярховы з падвалам складанай аб'ёмна-прасторавай кампазіцыі будынак. Складаецца з трох карпусоў. Цэнтральны корпус размешчаны з водступам ад чырвонай лініі забудовы. Да яго з двух бакоў перпендыкулярна прымыкаюць бакавыя Г-падобныя ў плане карпусы. Разам з цэнтральным корпусам яны ўтвараюць вялікі курданёр. Меншыя крылы бакавых карпусоў галоўнымі фасадамі арыентаваны на вул. Маскоўскую. У кампазіцыі, пабудаванай вакол курданёра, актыўнасць вуглавых аб'ёмаў падкрэслена ламанай уступамі лініяй фасадаў. Цэнтральны корпус накрыты двухсхільным дахам, бакавыя - вальмавымі. Фасады жылога дома патынкаваныя і пафарбаваныя, вырашаны лаканічна.