Будынак

Мураваны будынак пабудаваны ў 1892 г. тагачасным уладальнікам пляца Эвелем Борухавым Дырэктарам. Дом быў узведзены на месцы старых драўляных пабудоў. У фондах НГАБ захоўваецца праект будынка, датуемы сакавіком 1892 г. Запраектаваны будынак двухпавярховы, у плане меў чатырохвугольнік. Кампазіцыя галоўнага фасада вырашалася сіметрычна. Цэнтральная частка будынка вылучана слаба выражанымі пілястрамі (на ўзроўні другога паверха прафіляванымі). Яны былі ўвянчаны дэкаратыўнымі элементамі ў выглядзе вазаў. Рызаліт завяршаўся атыкам і паўцыркульным франтонам, аздобленым развітым карнізам з дэнтыкуламі і акратэрыямі. Тымпан франтона дэкарыраваны ляпнінай.