Адпраўлена!

Памылка!

Будынак

Цiкавае

Змест

Звесткі аб каштоўнасці

Шыфр

712Г000228

Катэгорыя каштоўнасці

аб'екты нацыянальнага значэння

Глава

Матэрыяльныя нерухомыя каштоўнасці

Тып каштоўнасці

Помнiк архiтэктуры Г

Падтып каштоўнасці

Помнiк жылой архiтэктуры

Месца знаходжання

г. Мінск, Маскоўскі раён, вул. Савецкая, 14

Датаванне

1903 г.

Стыль

мадэрн

Апісанне

Тэрыторыя квартала, у якім размешчаны будынак №14, пачала інтэнсіўна асвойвацца ў другой палове 19 ст. У першую чаргу гэтаму паспрыяла будаўніцтва ў 1871 г. Маскоўска-Брэсцкай і ў 1873 г. Лібава-Роменскай чыгункі. Паводле адміністрацыйна-паліцэйскага падзелу г. Мінска ў пачатку 20 ст. квартал атрымаў № 167. Участак з домам № 14 меў парадкавы № 5. Яго ўладальнікамі паслядоўна з'яўляліся Яніцкі Оскар Канстанцінавіч, затым Прашынскі Канстанцін Канстанцінавіч, апошнімі былі Кагановічы Ёсель Бенцыянаў і Цэля Хаямаўна. Згодна з архіўным дакументам, забудова ўчастка была ажыццёўлена К. Прашынскім. У 1903 г. на ўчастку быў пабудаваны мураваны трохпавярховы дом. На жаль, праект дома ў фондах Нацыянальнага гістарычнага архіва не выяўлены. Галоўным фасадам будынак выходзіў на вул. Захар'еўскую (сучасная вул. Савецкая). З правага боку ад будынка існаваў вузкі праезд у двор. За домам у двары стаялі драўляны дом, пабудаваны ў 1898 г., мураваны гаспадарчы будынак, пабудаваны ў 1906 г., і тры драўляныя гаспадарчыя пабудовы 1902, 1903 і 1905 гадоў будаўніцтва. У канцы ўчастка размяшчаўся сад. Мураваны трохпавярховы з падвалам будынак меў складаную канфігурацыю ў плане. Яго памеры складалі 36х9 + 33х9 + 30х12 + 27х9 + 15х12 і вышыня 20 аршын (аршын = 0,7112 м) . Па звестках на 1910 г. на першым паверсе 7-пакаёвую кватэру з кухняй і прыхожай (плошчай 414 кв. арш.) займаў віцэ-губернатар Мяжанаў-Каютаў. Другую 5-пакаёвую кватэру з кухняй і прыхожай (плошчай 444 кв. арш.) займаў натырыус Шчарбакоў.

Трохпавярховы з мансардным паверхам складаны ў плане будынак. Фасады часткова патынкаваны, часткова захавана цагляная муроўка, архітэктурны дэкор выкананы ў тынкоўцы і вылучаны белым колерам на фоне чырвона-цагляных сцен. Пластыка галоўнага фасада выразная, насычана шматлікімі вертыкальнымі і гарызантальнымі чляненнямі. Першы паверх аддзелены цягай, трактаваны як цокальны, апрацаваны буйным гарызантальным рустам. У цэнтры размешчаны дзвярны праёмі галоўнага ўвахода. Прамавугольныя вузкія аконныя праёмы ў кожным крыле згрупаваны па тры ў цэнтры і па два па баках, дэкарыраваны фігурнымі падаконнымі нішамі. На другім паверсе над уваходам размешчаны шырокі скруглены балкон з ажурнай рашоткай. Праём балконных дзвярэй аформлены руставаным абрамленнем. Фасадная сцяна 2-3-га паверхаў раскрапавана лапаткамі, прарэзана прамавугольнымі вузкімі і высокімі аконнымі праёмамі, аформленымі абрамленнямі, падаконныя прасценкі аздоблены дэкаратыўнымі элементамі. Сіметрычна на 2-м і 3-м паверхах размешчаны балконы з ажурнымі рашоткамі. Завершаны фасад развітым карнізам.