Будынак

Сярод пабудоў, якія захаваліся на вуліцы Пралетарскай з дарэвалюцыйных часоў - дом №17. Гэта аднапавярховы драўляны асабняк на цагляным цокале, які выходзіць на чырвоную лінію вуліцы. У ім, па звестках, атрыманых ад старажылаў, перад рэвалюцыяй пражываў фурман, які абслугоўваў сям’ю Паскевічаў. У той час будынак уяўляў сабой аб’ём, амаль квадратны ў плане і меў галоўны ўваход з парадным ганкам з боку вуліцы. У падвальной частцы яго размяшчаўся яўрэйскі малітоўны дом. Аднапавярховы драўляны на мураваным цокалі будынак накрыты двухсхільным дахам. Сцены гарызантальна ашаляваны. Вуглы акцэнтаваны лапаткамі. Прамавугольныя аконныя праёмы дэкарыраваны ліштвамі.