Будынак

Да нашага часу будынак захаваўся з нязначнымі стратамі гістарычнага вобліку. Будынак з'яўляецца яскравым прыкладам грамадзянскай забудовы Віцебска канца ХІХ - пачатку ХХ ст. Аднапавярховы мураваны прамавугольны ў плане будынак накрыты двухсхільным дахам. Сцены неатынкаваныя. Кампазіцыя галоўнага фасада асіметрычная. З левага боку быў размешчаны галоўны ўваход (замураваны да ўзроўня аконнага), аформлены характэрным прысценным двухкалонным парталам, завершаным трохвугольным франтонам. Прамавугольныя аконныя праёмы ў простых ліштвах аздоблены трохвугольнымі і паўцыркульнымі франтонамі, падаконнымі нішамі. Фасад завершаны карнізным поясам. Вуглы будынка акцэнтаваны лапаткамі. Дваровы фасад пазбаўлены дэкора, члянёны аконнымі праёмамі з клінчатымі перамычкамі.