Будынак

Будынак № 40 размешчаны на т.з. Кобрынскім фардштаце, які па тагачаснай нумарацыі меў парадкавы № 36, на пляцы пад № 11. Вуліца Камсамольская першапачаткова называлася Вазнясенскай, а з 1921 па 1939 гг. - Стэцкевіча. На мяжы 19 - 20 ст. пляц належаў Ф. Казлоўскай. У існаваўшым доме размяшчалася гасцініца "Мір".Паводле спіса домаўладальнікаў за 1924 г. уладальніцай пляца з забудовай была Тэкля Казлоўская. Існаваўшы на ўчастку будынак характарызаваўся як мураваны двухпавярховы. На жаль, год пабудовы не ўказаны. 

 Двухпавярховы з мансардным паверхам Г-падобны ў плане будынак накрыты двухсхільным дахам. Усходняе крыло ў двары адноўлена ў ранейшых габарытах з новага матэрыялу. Галоўны фасад патынкаваныя і пафарбаваны. Раскрапаваны лапаткамі. Плоскасць лапатак на першым паверсе апрацавана гарызантальным рустам, на другім дэкарыравана філёнгамі. Па гарызанталі фасад падзелены міжпаверхавай цягай, цокаль аддзелены карнізам. Сцяна першага паверха левай часткі будынка члянёна дзвярнымі і прамавугольнымі аконнымі (вітрыннымі) праёмамі. Фасадная сцяна правай паловы дома на першым паверсе і на другім паверсе прарэзана лучковымі аконнымі праёмамі ў прафіляваных ліштвах. На 2-м паверсе вокны падкрэслены тонкай падаконнай цягай, узбагачаны падаконнымі філёнгамі. Завершаны фасад шматслойным надаконным і вянчаючым карнізамі. Дваровы фасад нетынкаваны, прарэзаны аконнымі праёмамі з лучковымі перамычкамі, падзелены цягай з парэбрыкам, завершаны карнізам.