Будынак

Будынак № 7 праектаваўся як жылыя 32-х, 38-мі і 42-х кватэрныя дамы Міністэрства ўнутраных спраў па вул. Даўгабродскай, Кладбішчанскай і Радыстаў. Вул. Даўгабродская ў 1967 г. была перайменавана ў гонар В.І. Казлова. Вул. Кладбішчанская у 1955 г. была названа ў гонар Героя Савецкага Саюза Ф.А. Смалячкова. Вул. Радыстаў у 1987 г. вернута гістарычная назва Залатая Горка. Праектныя работы распачаліся ў 1951 г. ў "Мінгарпраекце" і праходзілі ў некалькі стадый. Аўтарам праекта быў архітэктар І.М. Рудэнка. Пяціпавярховы з падвалам П-падобны ў плане складанай аб’ёмна-прасторавай кампазіцыі будынак. Цэнтральнае крыло крыху вышэйшае за бакавыя. Бакавыя крылы ў плане блізкія да літары Г. У сувязі з паніжэннем рэльефу бакавое крыло па вул. Залатая Горка чатырохпавярховае, крыло па вул. Смалячкова з боку вулічнага фасада пяціпавярховае. Галоўны фасад, вулічныя і бакавыя фасады бакавых крылаў патынкаваныя і пафарбаваныя. Галоўны фасад мае сіметрычную кампазіцыю. У цэнтры размешчана праезная арка, праём якой аформлены прафіляваным руставаным абрамленнем.