Будынак

Будынак размешчаны ў гістарычным цэнтры г. Навагрудка, на паўночна-заходнім баку былой рыначнай плошчы, цяпер пл. Леніна. Будынак № 7 мае складаную будаўнічую гісторыю. Складаецца з двух розначасовых аб'ёмаў. Участак, на якім знаходзіцца будынак, размешчаны на рагу плошчы і вул. Паштовай (гістарычная назва вуліцы - завулак Базыльянскі). Правая (паўночна-ўсходняя) частка будынка з'яўляецца больш ранняй, згадваецца ў дакументах 1810 г. як дом Камінскіх. Левая (паўднёва-заходняя) частка дома пабудавана ў 1840-я гг. У выніку пасляваеннай рэканструкцыі будынкі аб'яднаны ў адзін аб'ём, у пэўнай ступені страцілі свой гістарычны воблік, зменена іх унутраная планіроўка.

Мураваны двухпавярховы трапецападобны ў плане будынак, які складаецца з двух аб'ёмаў, аб'яднаных двухсхільным дахам. Пад будынкам маюцца падвалы, перакрытыя скляпеннямі. Фасады патынкаваныя. Галоўны фасад вырашаны асіметрычна, першапачатковы выгляд страчаны.