будынак

Дакладная дата будаўніцтва дома № 5 па вул. Е. Полацкай нам не вядома. На думку даследчыкаў, будынак мог быць пабудаваны ў канцы 19 ст., найбольш верагодна, як жылы дом. У гады Вялікай Айчыннай вайны будынак ацалеў. Візуальнае даследаванне сучаснага стану будынка сведчыць, што за гады існавання значных перабудоў не адбывалася. Будынак двухпавярховы прамавугольны ў плане накрыты двухсхільным дахам. Галоўны фасад вырашаны асіметрычна. Вуглы дома, а таксама галоўны ўваход акцэнтаваны лапаткамі. Плоскасць сцяны чляніцца лучковымі аконнымі праёмамі: на першым паверсе ў ліштвах з прамымі сандрыкамі, на другім - у ліштвах з замковымі камнямі і дэкарыраваннымі падаконнымі нішамі. Аконныя праёмы на дваровым і тарцовым фасадах аформлены лучковымі перамычкамі. Гарызантальна будынак падзелены міжпаверхавай цягай. Па перыметры будынка праходзіць карніз.