Будынак

Будынак знаходзіцца ў Правабярэжным гістарычным раёне горада па вул.Савецкай Арміі (былая Шашэйная). Пабудаваны ў другой палове XIX стагоддзя ў цагляным стылі. Двухпавярховы прамавугольны ў плане будынак. Першапачаткова галоўны фасад быў неатынкаваны. У цэнтры размешчана праезная арка. Вуглы будынка акцэнтаваны раскрапаванымі лапаткамі. Гарызантальна фасад падзелены міжпаверхавай цягай, завершаны фрызам і прафіляваным карнізам. На першым паверсе прамавугольныя аконныя праёмы без ліштваў аформлены клінчатымі перамычкамі. З левага боку ад аркі два аконныя праёмы арачнага абрысу. На другім паверсе лучковыя аконныя праёмы дэкарыраваны клінчатымі перамычкамі, лучковымі сандрыкамі, падаконнымі нішамі, падкрэслены падаконнай цягай. Дзвярны праём аформлены металічным брылем на ажурных кранштэйнах. Дваровы фасад атынкаваны, члянёны на першым паверсе прамавугольнымі, на другім -- лучковымі аконнымі праёмамі. Да тарца будынка прымыкае мураваная сцяна з рэшткамі разабранай пабудовы.