Будынак былога дрожджава-вінакурнага завода

Вул. Маякоўскага ў мінулым называлася Ігуменскім трактам, Дачным праспектам, Чэрвеньскім трактам. Спачатку ў квартале, абмежаваным Ігуменскім трактам альбо Дачным праспектам (сучасная вул. Маякоўскага), вуліцамі Палявой, Мільённай (не захавалася) і Дзянісаўскай, у 1899-1900 гг. паводле ўзгодненага губернскім праўленнем праекта, распрацаванага інжынерам-тэхнолагам Р.Р. Хелхоўскім, быў пабудаваны крухмальна-паточны завод памешчыкаў Э.А. Вайніловіча, М.А. Ленскага і Я.І. Любанскага.

Мураваны адна-двухпавярховы будынак складанай аб'ёмна-прасторавай кампазіцыі. Асноўны двухпавярховы з мансардай прамавугольны ў плане корпус накрыты двухсхільным дахам. Фасады вымураваны з чырвонай цэглы, галоўны фасад зацёрты і пафарбаваны. Пластыка галоўнага і бакавога паўночнага фасада даволі выразная. Галоўны фасад раскрапаваны лапаткамі на тры часткі. Вуглавыя лапаткі на першым паверсе руставаныя, на другім - філянговыя. У завяршэнні вуглавых лапатак на даху пастаўлены чатырохгранныя слупкі, апаясаныя шматслойнымі карнізамі. Па гарызанталі галоўны фасад падзелены міжпаверхавымі паяскамі парэбрыка і сухарыкаў, падаконнай цягай, завершаны карнізам са ступеньчатымі сухарыкамі.