Будынак былога Маскоўскага міжнароднага банка

Дом стаіць па вуліцы Л. Талстога (былая Падзвінская). Вырашаны ў стылі ампір. Узведзены ў канцы 19 ст. Трохпавярховы з цокальным паверхам П-падобны ў плане будынак з рознавялікімі бакавымі крыламі. Атынкаваны. Плоскасць галоўнага асіметрычнага фасада з балконамі ў цэнтры завершана трохвугольным франтонам, акаймаваным па перыметру карнізным паяском з сухарыкамі. Аконныя праёмы прамавугольныя, з ліштвамі. Фасад аздоблены філёнгамі, міжпаверхавым прафіляваным поясам. Бакавы рызаліт вылучаны рустам, арачнымі броўкамі над вокнамі, 2 лучковымі ўваходнымі праёмамі. Лесвіцы вынесены ў тарцы бакавых крылаў.