Будынак былога Мінскага таварыства аматараў прыгожых мастацтваў

Забудова вул. К. Маркса (да 1922 г. называлася Падгорнай) пачала фармавацца ў канцы 18 -- пачатку 19 ст. Першапачаткова дамы на вуліцы былі пераважна драўляныя, з другой паловы 19 ст. узводзяцца мураваныя. Па адміністрацыйна-паліцэйскаму дзяленню г. Мінска ў канцы 19 - пачатку 20 ст. участак, на якім размешчаны будынак пад сучасным адрасам вул. К. Маркса, 17, знаходзіўся ў 1-ай частцы ў 18-м квартале пад № 11. Вядома, што гэты ўчастак з драўляным домам і флігелем у 1876 г. набыў у заслаўскага мешчаніна Яна Сянкевіча Абрам Кантаровіч. У хуткім часе А. Кантаровіч прадаў пляц Лейбе Мускіну (Мушкіну).