Будынак былога заезнага дома ("Аўстэрыя")

Трохпавярховы з падвалам (першапачаткова быў двухпавярховы) прамавугольны ў плане будынак накрыты вальмавым дахам. Сучаснай прыбудовай да тыльнага фасада злучаны з дваровым крылом, утвараючы адзіны аб'ём. Галоўны фасад былой аўстэрыі раскрапаваны буйнамаштабнымі (па краях і ў цэнтры руставанымі) лапаткамі і расчлянёны прамавугольнымі аконнымі праёмамі. У прасценках паміж вокнамі першага і другога паверхаў буйныя філёнгі.