Адпраўлена!

Памылка!

Будынак Гродзенскага абласнога драматычнага тэатра з дэкаратыўным аздабленнем інтэр'ера

Цiкавае

Змест

Звесткі аб каштоўнасці

Шыфр

413Г000778

Катэгорыя каштоўнасці

аб'екты рэгіянальнага значэння

Глава

Матэрыяльныя нерухомыя каштоўнасці

Тып каштоўнасці

Помнiк архiтэктуры Г

Падтып каштоўнасці

Помнiк грамадскай архiтэктуры

Месца знаходжання

Гродзенская вобласць, г. Гродна, вул. Маставая, 35

Датаванне

1977 – 1984 гг.

Стыль

Савецкі архітэктурны мадэрнізм з элементамі бруталізму

Апісанне

Тэатр першапачаткова разлічваўся на зрокавае ўспрыняцце з розных напрамкаў, таму асноўны аб’ём быў вырашаны як мнагаграннік. Яго вуглы акцэнтаваны выразнымі, дакладна прарысованымі крывалінейнымі пілонамі-контрфорсамі, якія акружаюць асноўны аб’ём з розных бакоў. Для стварэння цэльнага сілуэта будынка аўтары ўпісалі ў аб’ём сцэнічную каробку разам з дадатковымі памяшканнямі над глядзельнай залай і фае (жывапісна-дэкаратыўная майстэрня, склады, тэхнічныя памяшканні). Удала ўрэзаны ў цэнтральны аб’ём і меншы па вышыні аб’ём малой залы і артыстычных памяшканняў пры сцэне. Па задняму фасаду будынка размешчаны П-падобны ў плане трохпавярховы службова-адміністрацыйны корпус. Аб’ём корпуса ўзбагачаюць вуглавыя лесвічныя клеткі.

Дзякуючы прымяненню пілонаў-контрфорсаў, будынак мае звужаны да верху сілуэт. Размяшчэнне па перыметру масіўных апор – асноўны архітэктурны прыём рашэння фасадаў будынка. Яны расстаўлены з вялікім інтэрвалам і злучаюцца паміж сабой у плоскасці знешніх сцен своеасаблівымі “касынкамі”, якія ўтвараюцца арачнымі праёмамі на ўзроўні фае. Шырокі крок апор, буйныя памеры аконных праёмаў надаюць манументальны характар гэтаму будынку, што адпавядае шырокаму прастораваму акружэнню.

Буйныя памеры паўкруглых вакон выяўляюцца з дапамогай іх расчлянення вертыкалямі бетонных рэбраў, што надае стройнасць і неабходную дэталіроўку фасадам. Вышэй яго паўтарае больш часты крок меншых па памеры рэбраў, якія расчляняюць пояс вакон чацвёртага паверха.