Сядзіба размешчана на паўночнай ускраіне вёскі, на правым беразе р. Зальвянка. Уключае сядзібны дом, флігель, тры гаспадарчыя будынкі, агароджу з брамай, парк.

 Сядзіба, якая захавалася да нашага часу пабудавана ў другой палове 19 ст. Раманам Бохвіцам і яго жонкай Эльжбетай. Па звестках Р. Афтаназі, на той час тут ужо існаваў мураваны прамавугольны, выцягнуты ў плане сядзібны дом, накрыты высокім дахам. На галоўным фасадзе будынак, верагодна, меў калонны ганак. Бохвіцы перабудавалі існаваўшы дом, а менавіта змянілі яго цэнтральную частку. Аўтарам праекта перабудовы з'яўляўся архітэктар Луба з Вільні. Вакол сядзібнага дома быў разбіты англійскі парк. На ўездзе на тэрыторыю сядзібы стаяла мураваная брама ў неабарочным стылі, пабудаваная пазней, на мяжы 19-20 ст. У пасляваенны час у 1950 -- 1960 гг. у сядзібным доме размяшчалася школа, у 1960-1970 гг. -- пошта і ашчадная каса, затым сельсавет.