Адпраўлена!

Памылка!

Былы дом купца Мураўёва

Цiкавае

Змест

Звесткі аб каштоўнасці

Шыфр

412Г000666

Катэгорыя каштоўнасці

аб'екты нацыянальнага значэння

Глава

Матэрыяльныя нерухомыя каштоўнасці

Тып каштоўнасці

Помнiк архiтэктуры Г

Падтып каштоўнасці

Помнiк жылой архiтэктуры

Месца знаходжання

Гродзенская вобласць, г. Гродна, пл. Савецкая, 2

Датаванне

кан. 1880-х - пач. 1890-х гг.

Стыль

Мадэрн, псеўдарускі

Апісанне

Будынак абласной навуковай бібліятэкі імя Я.Ф. Карскага (былы дом купца Мураўёва) размешчаны ў гістарычным цэнтры Гродна на былой Рыначнай плошчы, якая сфарміравалася ў XIV-XV стст. (гістарычныя назвы плошчы - Рынак, Ратушная плошча, Парадная плошча, Стэфана Баторыя, сучасная назва - Савецкая плошча).

Будаўніцтва дома было завершана ў 1888 г. Стыль будынка можна аднесці да эклектыкі, у гэтым жа стылі пабудаваны флігелі, фасады, якіх былі пазней атынкаваныя. Паверхі былі звязаны паміж сабой параднай (трохмаршавай) лесвіцай, была таксама ўнутраная лесвіца, якая вяла з 2-га на 3-ці паверх. Акрамя таго была так званая "чорная лесвіца", якая размяшчалася паміж асноўным аб'ёмам і флігелем, які выкарыстоўваўся як "даходны дом". Інтэр'ер вестыбюля, лесвічнай клеткі, вялікай гасцінай, дзіцячага пакоя для гульняў, сталовай і жылыя памяшканні (3-ці паверх) былі ўпрыгожаны дэкаратыўным роспісам, ляпнінай і ляпнымі плафонамі. У доме была электрычнасць, вадаправод, каналізацыя, але ацяпляліся памяшканні печкамі і камінамі.

У 1934 г. будынак, верагодна толькі асноўны аб'ём, быў куплены гарадскім магістратам у Н. І. Мураўёва з мэтай размясціць у ім гарадскую бібліятэку. У флігелі размяшчаліся яўрэйскія грамадскія арганізацыі - "Бейтар", "Бунд" і "Клуб ізраелітаў", пры якіх была бібліятэка. На 17 верасня 1929 г. у бібліэтэцы налічвалася больш 31000 кніг.

У 1957-58 гг. флігель, падвал і першы паверх асноўнага аб'ёма былі перададзены абласной бібліятэцы. У гэтым будынку абласная навуковая бібліятэка імя Я. Ф. Карскага размяшчалася да 1989 г. Будынак быў вызвалены ў сувязі з плануемым капітальным рамонтам. З гэтага часу будынак практычна не выкарыстоўваўся, але ў 1991-92 гг. частка памяшканняў 2-га і 3-га паверхаў здавалася ў арэнду.

На сённяшні дзень будынак прадстаўляе сабой трохпавярховы Г-падобны ў плане аб'ём. Кампазiцыя галоўнага фасада сiметрычная. Цэнтральную яго частку на 2-м паверсе займае вялікі на 3 праёмы балкон з літай фiгурнай агароджай. На 3-м паверсе крайнія арачныя праёмы з невялікімі балконамі. Плоскасць фасада крапавана пілястрамі з чугуннымі вензелямі ў завяршэнні, да ўзроўню 2-га паверха руставаная.