Дом Максіма Танка

Народны паэт Беларусі Максім Танк (Яўген Іванавіч Скурко, або Скурка, як вымаўляюць яго аднавяскоўцы) нарадзіўся 17 верасня 1912 г. ў в. Пількаўшчына Мядзельскага раёна ў сялянскай сям'і. Вёска Пількаўшчына вядома з 1868 г., адносілася да Вілейскага павета Віленскай губерні. На той час у ёй існавала 6 двароў і 49 жыхароў. У 1908 г. ужо налічвалася 19 двароў і 119 жыхароў. З 1921 г. Пількаўшчына ў Мядзельскай гміне Дунілавіцкага, а з 1925 г. Пастаўскага павета Віленскага ваяводства ў складзе Польшчы.