Фартыфікацыйныя збудаванні 68-га Гродзенскага ўмацаванага раёна: рэшткі аднапавярховага двухамбразурнага гарматна-кулямётнага паўкапаніра

Рэшткі аднапавярховага двухамбразурнага гарматна-кулямётнага паўкапаніра № 56 (ОППК) уяўляюць руіны доўгачасовага фартыфікацыйнага збудавання для вядзення фланкіраванага агню з жалезабетону памерамі  12 х 9 м, вышыня 3 м (таўшчыня сцен ад 1,2 да 1,6 м, франтальныя сцены і верхняе пакрыццё ўзмоцнены кацельным жалезам таўшчынёй 0,5 мм). Дот складаўся з наступных памяшканняў: абароны ўвахода (сквознік), двух супрацьхімічных тамбураў, каземата каменданта з радыёстанцыяй і пераскопам, аднаго каземата для кулямётнай устаноўкі НПС-3 (7,62 мм кулямёт “Максім” з аптычным прыцэлам КТ), аднаго каземата для гарматнай устаноўкі ДОТ-4 (45 мм гармата з кулямётам ДС і аптычным прыцэлам КТ), памяшканняў для захоўвання боепрыпасаў, фільтравентыляцыйнай устаноўкі, генератара, прыбіральні з амбразурай абароны ўвахода, Дот моцна пашкоджаны пад час баёў у чэрвені 1941 г.: разбураны ўнутраныя памяшканні, адсутнічаюць тылавая сцяна і частка франтальнай сцяны з бранявым вузлом устаноўкі ДОТ-4, захавалася франтальная сцяна з бранявым корабам кулямётнай устаноўкі НПС-3. Захаваўся агульны аб’ём збудавання.