Гарадзішча

Гарадзішча збудавана на шырокай касе, вышыня над поплавам 3 м. Гарадзішча мае авальную форму, памерамі 165x145 м. Пляцоўка агароджана валам, вышынёй 1,5 м і рвом глыбінёй 1 м. Паўднёвая частка гарадзішча (роў, вал і частка пляцоўкі) пашкоджана траншэямі савецка-польскай і Другой сусветнай войн. Праз цэнтр гарадзішча праходзіць дарога на луг, у бок в. Глебава Рудня.

Абавязковымі элементамі, якія падлягаюць захаванню, з’яўляюцца валы, равы, пляцоўка (інжынерна-фартыфікацыйныя збудавання) і культурны пласт гарадзішча.

Помнік мае вельмі важнае значэнне для вывучэння гісторыі Бабруйскага раёна, таму што раскопкі гарадзішчаў даюць вельмі каштоўную гістарычную інфармацыю аб жыцці насельніцтва ў раннім жалезным веку і сярэднявеччы, аб матэрыяльнай і духоўнай культуры, аб сувязях з блізкімі і далёкімі суседзямі, дазваляюць удакладніць межы рассялення балцкіх і славянскіх плямёнаў.