Гарадзішча перыяду ранняга жалезнага веку

На гарадзішчы выяўлены культурны пласт (пласт зямлі, які ўтварыўся ў выніку жыццядзейнасці чалавека) таўшчынёй ад 0,3 - 0,6 м да 1,8 м. Выяўлена збудаванне, якое магло мець адносіны да ўмацавання гарадзішча, яго вала. Знойдзены рэчы жалезнага веку: жалезныя кап’ё з утулкай і нож з гарбатай спінкай, гліняныя праселкі, вырабы з косці, грубаляпная кераміка днепра-дзвінскай культуры і некалькі фрагментаў посуду з расчосамі (кіеўская культура III - VI стагоддзяў), а таксама ляпны гладкасценны і архаічных форм посуд, каменная вымастка. Жалезны двухшыпны наканечнік стралы датуецца XII - XIII стагоддзямі. Помнік адлюстроўвае пэўны перыяд развіцця духоўнай і матэрыяльнай культуры насельніцтва, якое жыло раней на тэрыторыі сучаснага Гарадоцкага раёна. Матэрыялы даследаванняў захоўваюцца ў Інстытуце гісторыі НАН Беларусі і часткова ва ўстанове культуры "Гарадоцкі раённы краязнаўчы музей”.