Гарадзішча Слонім-Косаўскі тракт-1 размешчана на паўднёвай ускраіне горада, на мысе вялікага ўзвышша, ва ўрочышчы Косаўскі тракт. Вышыня над наваколлем да 8-10 м. Пляцоўка авальная, умацавана з паўднёвага боку валам. Помнік задзірваваны і часткова парос дрэвамі.

Гарадзішча абследавалі ў 1963 г. В.Р. Супрун, у 1974 г. Л.Д. Побаль. Былі выяўлены абломкі ляпной гладкасценнай керамікі і ганчарнай керамікі раннефеадальнага часу, косці жывёл. На глыбіні 0,5 м было ўскрыта агнішча памерам 1х1,5 м. Зафіксаваны пласт пажару. Гарадзішча датуецца жалезным векам і сярэднявеччам (1 тыс. н.э., Х-ХІ стст.). Па меркаванню яго даследчыкаў (С.А. Піваварчыка), гарадзішча перастала функцыянаваць у XI ст. пасля пажару.

У 2011 г. сучасны стан помніка абследавалі М.І. Ткачова і З.А. Харытановіч.