Капліца

Капліца ўяўляе сабой выдатны прыклад сакральнага народнага дойлідства пачатку XIX стагоддзя.   Капліца на пад’ездзе да былой сядзібы графаў Гюнтэраў ў Дабраўлянах 1826 года была пабудавана на сродкі знакамітага ўладальніка –  графа Адама Гюнтэра фон Гейдэльсгейма (1782–1854). Гюнтэр запрасіў вядомага архітэктара Яна Барэці, па праекту якога стары палац быў перабудаваны ў класічным стылі. Калі сям’я пасялілася ў ім, дом напоўніўся рэдкімі кнігамі і рукапісамі. Сцены ўпрыгожвалі палотны Арловіча, Дамеля, Норбліна, Рустэма, Смуглевіча і Чаховіча. На першым паверсе палаца – капліца, распісаная  Казімірам Бахматовічам. Яна адначасова выконвала ролю гістарычнага музея.

Паркам займалася Аляксандра Гюнтэр. Яна перарабіла яго ў модным у той час рамантычным стылі. У ім была вялікая колькасць гротаў, альтанак, скульптур, клумбаў. Паступова гаспадары ператварылі сваю сядзібу ў цэнтр высокай культуры і духоўнасці.

Сёння ад былога палацава-сядзібнага комплекса Гюнтэраў засталіся толькі закінуты парк, некаторыя гаспадарчыя пабудовы і 2 капліцы. Прыдарожная капліца 1826 года адлюстравана на літаграфіі Казіміра Бахматовіча.Казімір Бахматовіч (1808-1837) — беларускі графік і жывапісец. Нарадзіўся, меркавана, ў Дабраўлянах. Быў хатнім настаўнікам малявання ў Гюнтэраў.  Больш за ўсе ствараў карціны ў жанры літаграфіі. У 1835 годзе выканаў цыкл літаграфій “Дабраўлянскі сувенір”, які складаецца з 10 лістоў з выявай парка і палаца Гюнтэраў і сцэнак з жыцця панскага двара. Гэта была своеасаблівая мастакоўская падзяка роднай зямлі. Менавіта ў гэты цыкл і ўвайшла літаграфія прыдарожнай капліцы, якая захавалася ў першапачатковым выглядзе да нашых дзен.