Карціна "Божая Маці з дзіцем", А. Ромэр

Ансамбль кляштара францысканцаў у Пінску выдатны помнік беларускага барока. Архітэктурнай дамінантай ансамбля з'яўляецца касцёл Успення Прысвятой Дзевы Марыі. Інтэр'ер касцёла багата дэкарыраваны. Сярод арыгінальных жывапісных работ у касцёле вызначаецца карціна А. Ромэра "Божая Маці з дзіцем". Мастак прымаў удзел у роспісы праваслаўных і каталіцкіх храмаў у Камаях, Пінску. Карціна "Божая Маці з дзіцем" мае другую назву "Пінская Мадонна". Лёс карціны склаўся ўдала. Яна была створана ў 1894 г. і з таго часу знаходзіцца ў касцёле. Карціна памерам 140х280 см, напісана алейнымі фарбамі. Маці Божая ў вобразе маладой жанчыны ў блакітнай накідцы. Пад хусцінкай развіваюцца доўгія распушчаныя валасы. На руках яна пяшчотна па-мацярынскі трымае дзіця. Толькі па яркаму промню з неба і ледзь заўважнаму німбу над яе галавой можна зразумець, што гэта Мадонна. Нешта няўлоўна жывое ёсць у карціне: фігура жанчыны, падкрэсленая складкамі аддзення, валасы, якія падаюць локанамі на лоб, дзіця, якое прыціснулася да шчакі маці -- маляўнічы вобраз вялікага таямніцтва прыроды.