Касцёл

Гісторыя касцёла Ўшэсця Хрыстова ў в. Дзеркаўшчына Глыбоцкага раёна Віцебскай вобласці пачалася ў XIX стагоддзі. Ініцыятарам яго ўзвядзення стаў маршалак шляхты Лявон Дамейка – уладар маёнтка Сітцы непадалёку ад сучаснай вёскі. Згодна падання, Дамейка доўгі час не мог дабіцца ад мясцовых уладаў дазволу на пабудову каталіцкага храма, а таму пачаў узводзіць яго пад выглядам гаспадарчай пабудовы – свірана, пра што сведчаць  круглыя аканіцы на тыльным баку касцёла і адсутнасць апсіды. Праз некаторы час храм удалося легалізаваць, асвячэнне яго адбылося 22 мая 1822 года. 

У Вялікую Айчынную вайну касцёл быў пашкоджаны, але пасля невялікага перапынку -  ізноў адчынены. Дзейнічаў да 1959 г., затым быў зачынены і прыстасаваны пад зернесховішча (1959-1970 гг.). Амаль 20 гадоў будынак не выкарыстоўваўся. 

У 1989 годзе святыню вярнулі вернікам, пачаліся рамонтныя работы, 15 мая 1990 года ён быў адкрыты. На асвячэнне прыехалі 24 святары і арцыбіскуп Тадэвуш Кандрусевіч. 

У 2013 – 2015 гадах у храме праводзіўся касметычны рамонт, падчас якога з’явіўся фрэскавы роспіс, выкананы членам Беларускага саюза мастакоў Уладзімірам Кандрусевічам.