Будынак № 13 будаваўся ў комплексе гарадской сядзібы як паўднёвы флігель. Па пісьмовых крыніцах сядзіба вядома з 18 ст. На найбольш ранніх планах горада канца 18 ст. на плошчы Высокага рынку сядзібны комплекс пазначаны як мураваны. У глыбіні ўчастка размешчаны сядзібны дом - прамавугольны ў плане будынак. Яго фланкіравалі два Г-падобныя ў плане флігелі. Яны ўтваралі перад домам парадны двор. Вядома, што сядзіба належала графу Міхаілу Пшэздзецкаму. 

Падчас Вялікай Айчыннай вайны будынкі былой сядзібы захаваліся. Пасля вызвалення Мінска ў будынку размясціўся адзін з першых пасляваенных кінатэатраў "Радзіма". Пазней былы флігель быў прыстасаваны для размяшчэння ўстаноў Мінскага аблвыканкама. Будынак адносіцца да найбольш старых грамадзянскіх пабудоў, якія захаваліся ў Мінску.