Сядзібна-паркавы комплекс, размешчаны на паўночнай ускраіне вёскі Волма на беразе ракі Валмянка, з'яўляецца адным з нямногіх добра захаваўшыхся на тэрыторыі сучаснага Дзяржынскага раёна Мінскай вобласці. Паводле захаваўшагася ў фондах Нацыянальнага гістарычнага архіва інвентара за 1750 г., складзенага апекунамі Адама Ваньковіча, сядзіба Волма складалася з цэлага шэрагу будынкаў, аднак усе яны былі драўляныя. У пачатку XIX ст. на месцы старой драўлянай сядзібы быў створаны новы сядзібна-паркавы комплекс. Рэгулярна спланаваны ансамбль уключаў сядзібны дом, які быў цэнтрам усёй кампазіцыі, флігель, службовы корпус, мураваную капліцу, парк.