Касцёл. Трохнефавая аднавежавая базіліка з цыліндрычнай апсідай і бакавымі сакрысціямі. Магутны цэнтральны неф пераходзіць у паўкруглую апсіду, на галоўным фасадзе завершаны вялікай квадратнай ў плане чатырох'яруснай вежай абарончага характару, накрытай шатровым дахам. Ярусы вежы падзелены прафіляванымі карнізамі. Рэнесансавы абарончы характар вежы надавала крапоўка плоскіх сцен арачнымі нішамі-экседрамі. Бакавыя нефы ніжэйшыя, накрытыя аднасхільнымі дахамі. Да бакавых нефаў на галоўным фасадзе прылягаюць круглыя ў плане вежачкі з вітымі ўсходамі, з боку алтарнай часткі -- закругленыя ў плане сакрысціі з пяціграннымі вежачкамі. Бакавыя фасады прарэзаны высокімі аконнымі праёмамі з паўцыркульным завяршэннем. Дзверы аздоблены мастацкай акоўкай. Унутраная прастора расчлянёна шасцю чатырохграннымі слупамі на 3 нефы.