Курганны могільнік

Курганны могільнік складаецца з 74 насыпаў вышынёй 0,2-2,3 м, круглых (дыяметр 2-12 м) i авальных (выцягнутыя з захаду на ўсход i з поўначы на поўдзень). У 1893 г. Ф.В, Пакроўскі раскапаў 4 курганы, у 1972 г. абследаваў М.М. Чарняўскі, у 1982, 1986 і 1987 гг. - Л.У. Дучыц і В.І. Шадыра. 

Знойдзены нажы, сякеры, наканечнік кап'я, драцяны бранзалет, 2 грушападобныя бразготкі, шкляныя лімонападобныя і з вочкамі пацеркі, ланцужкі і ланцугатрымальнікі, трапецападобныя падвескі, жалезныя і бронзавыя спражкі, падковападобная фібула са спіралепадобнымі канцамі, ляпны і ганчарны посуд. 

Могільнік належаў балта-славянскаму насельніцтву, адлюстроўвае працэс асіміляцыі славянамі мясцовага насельніцтва на заходняй ускраіне Полацкага княства.