Курганны могільнік

Курганны могільнік з'яўляецца помнікам пахавальнага абраду ўсходне-славянскіх плямён. Помнік адлюстроўвае пэўны перыяд (IX - XIII стст.) развіцця духоўнай культуры ўсходнеславянскіх плямён, якія жылі на тэрыторыі Чашніцкага раёна. Помнік археалогіі знаходзіцца 2,3 км. на паўднёвы ўсход ад вёскі, паміж паўднёва-заходнім берагам возера Лукомльскае і дарогай Н-3815 “Стаўбцы -Новалукомль”, пры дарозе на санаторый “Сасновы бор”. могільнік уяўляе сабой 11 насыпаў акруглай формы вышынёй 0,6 - 2,5 м, дыяметрам - да 12,0 м. Вакол некаторых насыпаў маецца равок. 3 поўначы ахоўная зона гісторыка-культурнага аб’екта абмежавана аўтастаянкай санаторыя і краем марэннай грады. Курганны могільнік каля вёскі Стаўбцы, Чашніцкага раёна даследаваны беларускімі археолагамі, аднак, раскопкі не праводзіліся. Магчыма, пры правядзенні археалагічных раскопак, можна будзе знайсці рэчавыя крыніцы, якія будуць мець важнае значэнне пры вывучэнні гісторыі Беларусі ў старажытны час. Помніку археалогіі нададзены статус гісторыка-культурнай каштоўнасці 3-й катэгорыі.