Курганны могільнік перыяду ранняга сярэднявечча

Курганныя насыпы каля вёскі Панюшкавічы з’яўляюцца матэрыяльным археалагічным і духоўным помнікам.

Група з трох круглых курганоў паўсферычнай формы, выцягнута па лініі захад - усход. Вышыня курганоў - 0,4-0,8 м, дыяметр - 6-11 м. Насыпы задзернаваны, параслі дрэвамі. Курган № 2 пашкоджаны скарбашукальніцкай ямай, памерам 6x4,8 м, глыбінёй 0,3 м.

Абавязковым элементам для захавання выступаюць самі насыпы, якія выконвалі функцыю прытулку для душы, а таксама раўкі вакол насыпаў і пахавання пад курганамі.

Помнік мае вельмі важнае значэнне для вывучэння гісторыі Бабруйскага раёна, таму што раскопкі курганоў даюць вельмі каштоўную гістарычную інфармацыю аб жыцці сельскага насельніцтва ў раннім сярэднявеччы, аб матэрыяльнай і духоўнай культуры, аб сувязях з блізкімі і далёкімі суседзямі, дазваляюць удакладніць межы рассялення славянскіх плямёнаў. Самі курганы, насыпаныя праз адно-два стагоддзі пасля хрышчэння Русі сведчаць аб рэлігійным сінкрэтызме - "двухвер'і" людзей таго часу.