Курганны могільнік перыяду ранняга сярэднявечча

Магільныя насыпы каля вёскі Сімгаравічы з’яўляюцца матэрыяльным археалагічным і духоўным помнікам. 

Курганны могільнік знаходзіцца на левым беразе безназоўнага ручая, за 1 км на паўднёвы захад ад вёскі Сімгаравічы за 0,3 км на паўночны ўсход ад вёскі Тажылавічы, сярод забалочанай нізіны, па абодва бакі дарогі паміж вёскамі, за 0,2 км на поўдзень ад могілак, ва ўрочышчы Курганне, мясцовая назва “Швецкія могілкі”, у лесе.

Абавязковым элементам для захавання выступаюць самі насыпы, якія выконвалі функцыю прытулку для душы, а таксама раўкі вакол насыпаў і пахавання пад курганамі.

Помнік мае вельмі важнае значэнне для вывучэння гісторыі Бабруйскага раёна, таму што раскопкі курганоў даюць вельмі каштоўную гістарычную інфармацыю аб жыцці сельскага насельніцтва ў раннім сярэднявеччы, аб матэрыяльнай і духоўнай культуры, аб сувязях з блізкімі і далёкімі суседзямі, дазваляюць удакладніць межы рассялення славянскіх плямёнаў. Самі курганы, насыпаныя праз адно-два стагоддзі пасля хрышчэння Русі сведчаць аб рэлігійным сінкрэтызме - "двухвер'і" людзей таго часу.