Мазаіка на дамах па пр. Незалежнасці

Мазаікі на тэмы воінскай славы, росквіту навукі і мастацтва выкананы на тарцовых сценах жылых дамоў, арыентаваных на праспект Незалежнасці у мікрараёне Усход у Мінску. Творам мастака ўласціва глыбокая ідэйнасць і прафесійнае майстэрства, высокая пластычная культура. Мазаіка "Горад мастацтва" выканана на тарцовай сцяне жылога дома № 131, корп. 1. У цэнтры па восевай лініі фігура Маці, якая нібы настаўляе ў жыццё хлопчыка-падлетка, ніжэй па гарызанталі выявы фальклорнага ансамбля і фігур, якія ўвасабляюць розныя віды мастацтва. У надцокальным крузе меншага маштабу выява гусляра, над ім - выява рук як сімвал стварэння. Мазаіка "Горад-будаўнік" на тарцовай сцяне дома № 143, корп. 1. Цэнтр яе займае фігура Маці з хлопчыкам падлеткам. Вакол выявы дойлідаў, рабочых, студэнтаў. Сюжэты размешчаны сіметрычна па вертыкальных і гарызантальных восях. Удалае іх размеркаванне на панэльнай сцяне, залацістыя і бірузовыя колеры надаюць малюнку выразнасць і дэкаратыўнасць. Сонца ў крузе і паўкружжа вясёлкі завяршаюць выяўленчы рад мазаікі.Мазаіка "Горад навукі" на тарцовай сцяне жылога дома № 155, корп. 1. Асноўным кампазіцыйным і сэнсавым цэнтрам з'яўляецца фігура Маці, якая навучае сына. У крузе выява лётчыка-касманаўта. У надцокальным крузе дадзены паясны партрэт Ф. Скарыны, вышэй -- фігура, якая нагадвае аналітычныя малюнкі Леанарда да Вінчы. Побач з сімвалічным гербам Мінска выявы вучоных з атрыбутамі працы. Усе выявы размешчаны сіметрычна, упісаны ў авалы і кругі, аддзелены паўкружжамі вясёлак.Мазаіка "Горад-воін" на тарцы дома № 82, корп. 2. Створана складанай мовай сімволікі: далоні рук, якія нібы засцерагаюць галінку, -- сімвал стварэння; фігура трубача -- алегорыя славы, постаць жанчыны з васількамі, якая сустракае воінаў-пераможцаў; фігура сейбіта. У цэнтры кампазіцыі -- выява Маці з хлопчыкам-падлеткам.