Адпраўлена!

Памылка!

Месца, дзе стаяў дом, у якім нарадзіўся М.Багдановіч

Цiкавае

Змест

Звесткі аб каштоўнасці

Шыфр

713Д000011

Катэгорыя каштоўнасці

аб'екты рэгіянальнага значэння

Глава

Матэрыяльныя нерухомыя каштоўнасці

Тып каштоўнасці

Помнiк гiсторыi Д

Месца знаходжання

г. Мінск, Цэнтральны раён, вул. Багдановіча М.

Датаванне

1880 г.

Апісанне

Звесткі аб дакладным месцы нараджэння Максіма Багдановіча знаходзяцца сярод рукапісаў бацькі паэта, Адама Ягоравіча Багдановіча, які на працягу 1923-1924 гадоў па просьбе Кафедры гісторыі беларускай літаратуры Інстытута Беларускай Культуры перадаў Інстытуту 14 папак рукапісаў паэта і іншых дакументаў, што маюць дачыненне да творчасці і біяграфіі Максіма. Сярод іх і ўласны рукапіс А.Я. Багдановіча пад назвай "Материалы к биографии Максима Адамовича Богдановича". Гэты дакумент упершыню апублікаваны ў 1928 годзе, потым у 1965 і 1975 гадах. Вось што ў ім гаворыцца: "Детей у нас было четверо. Первенец Вадим родился в марте 1890 г., Максим - 27 ноября 1891 г. Оба родились в Минске, на Троицкой горе на Александровской улице, в доме Коркозевича (теперь №25), что во дворе, во втором этаже, где в то время помещалось 1-е приходское училище и моя учительская квартира (направо от входа)". У гэтым доме Максім пражыў ад дня нараджэння да чэрвеня 1892 года, калі яго бацька з прычыны пагаршэння здароўя вымушаны быў змяніць працу і пераехаў з сям'ёй у Гродна. Паводле даведніка "Весь Минск" на 1911 г., дом № 25 знаходзіўся на левым баку вуліцы Аляксандраўскай (сучасная вул. М.Багдановіча), у квартале, абмежаваным вул. Паліцэйскай (вул. Троіцкай, сучасная вул. Старажоўская) і зав. 1-м Семінарскім (сучасная вул. Архітэктара Заборскага). Па адміністрацыйным падзеле г. Мінска ў канцы 19 - пачатку 20 ст. гэты квартал атрымаў парадкавы № 45. Да рэканструкцыі набярэжнай уздоўж Свіслачы і змены трасіроўкі вуліцы Старажоўскай квартал займаў значна большую плошчу і быў амаль прамавугольнай формы. Ён быў падзелены на 16 пляцаў, забудова якіх была даволі шчыльнай. Да нашага часу ў перабудаваным выглядзе захаваліся дом № 25 па вул. М.Багдановіча і дом № 3 па вул. Архітэктара Заборскага, якія непасрэдна межавалі з флігелем, у якім нарадзіўся паэт. У 1959 г. (новы варыянт зроблены ў 1982 г.) на фасадзе рэканструяванага жылога дома № 25 была ўстаноўлена мемарыяльная дошка з надпісам: "На гэтым месцы знаходзіўся дом, у якім 9 снежня (27 лістапада) 1891 г. нарадзіўся выдатны беларускі паэт Максім Багдановіч". Надпіс не зусім адпавядае рэчаіснасці, бо як вышэй было адзначана, будынак №25 пабудаваны пазней нараджэння паэта, у 1894 г., а ў 1946-47 гг. адноўлены. Аналіз архіўных дакументаў паказаў, што М.Багдановіч нарадзіўся ў змешаным флігелі, які знаходзіўся ў двары, прыкладна на адлегласці 10 м ад дваровага фасада дома № 25. Хутчэй за ўсё, флігель згарэў у Вялікую Айчынную вайну. У 2011 - 2013 гг. падчас будаўніцтва жылога дома па вул. Старажоўскай, 6 была рэканструявана і добраўпарадкавана ўнутрыквартальная тэрыторыя. Адначасова паблізу месца, дзе стаяў дом, у якім нарадзіўся М.Багдановіч, быў устаноўлены мемарыяльны знак.