Праабражэнская царква

Паводле пісьмовых крыніц Дзмітравічы згадваюцца ў другой палове XVI ст. у складзе Брэсцкага павета і ваяводства Вялікага княства Літоўскага. У 1786 годзе пабудавана драўляная Спаса-Праабражэнская царква. Царква ўяўляе сабой найбольш просты тып праваслаўнага храма. Гэта адназрубны, прамавугольны ў плане будынак без асобнай апсіды з невялікім прытворам на галоўным
фасадзе. Храм манументальны, даволі высокі, накрыты двухсхільным дахам, які ў цэнтры
ўвенчаны цыбулепадобнай галоўкай на васьмігранным барабане. Галоўны фасад завершаны
высокім трохвугольным франтонам, дэкарыраваным крыжападобнымі сцяжкамі і ашаляваны.  Значную мастацкую каштоўнасць уяўляе драўляны іканастас першай паловы XIX ст., дэкарыраваны драўлянай разьбой з пазалотай. У цэнтры кампазіцыі іканастаса - царскія вароты са скразной драўлянай разьбой у выглядзе пазалочанага пляцення з вінаградных лоз. У іканастасе каштоўныя абразы XVIII ст. Спаса-Праабражэнская царква з’яўляецца характэрным помнікам драўлянага
дойлідства XVIII ст., вылучаецца стройнымі прапорцыямі, строгасцю архітэктурнага аблічча,
простымі формамі.