Рэшткі замка

Паселішча Геранёны згадваецца ў пісьмовых крыніцах пачынаючы з першай паловы XV ст. Мяркуецца, што на мяжы XV - пачатку XVI ст. тут быў пабудаваны мураваны замак, які належаў Гаштольдам да 1542 г. Непрыгодным для абароны і жыцця замак аказаўся ўжо пасля вайны 1654-1667 гадоў. На думку некаторых навукоўцаў, у ХІХ ст. вялікая колькасць мураванага матэрыялу замка была вывезена на розныя пабудовы ў суседнія пасяленні, у тым ліку Ліпнішкі (для будаўніцтва касцёла). Да цяперашняга часу захаваліся рэшткі абарончых валаў, вуглавых вежаў, равоў.