Адпраўлена!

Памылка!

Сядзiба: парк; рэшткi падмурка сядзiбнага дома; гаспадарчая пабудова

Цiкавае

Змест

Звесткі аб каштоўнасці

Шыфр

213Г000386

Катэгорыя каштоўнасці

аб'екты рэгіянальнага значэння

Глава

Матэрыяльныя нерухомыя каштоўнасці

Тып каштоўнасці

Помнiк архiтэктуры Г

Падтып каштоўнасці

Помнік сядзібнай архітэктуры

Месца знаходжання

Віцебская вобласць, Глыбоцкі раён, в. Залессе

Датаванне

сяр. ХIХ ст.

Апісанне

Сядзіба ў в. Залессе, рэшткі якой захаваліся да нашага часу, была сфарміравана на працягу другой паловы XVIII ст. паміж азёрамі Мурамшчына (сустракаецца напісанне Мураўшчына) і Белае. Усходнюю частку сядзібы займалі пабудовы (сядзібны дом, стайня, карэтная, гаспадарчыя будынкі), заходнюю - лесапарк.

Мураваны сядзібны дом быў пабудаваны ў 2-й палове ХІХ ст. Меў рысы архітэктуры неагатычнага стылю. Цэнтральны корпус быў двухпавярховы, бакавыя крылы аднапавярховыя. Будынак быў узведзены з чырвонай цэглы, нетынкаваны. У Вялікую Айчынную вайну жылы дом быў часткова разбураны, захавалася ўсходняя частка дома з верандай, якія ў 1982 г. былі разабраныя. На дадзены момант на месцы былога сядзібнага дома захаваліся толькі вельмі нязначныя рэшткі яго падмурка (асобныя камяні і фрагменты цэглы).

У адной стылістычнай трактоўцы з сядзібным домам быў выкананы будынак стайні, прамавугольны ў плане, узведзены з чырвонай цэглы, нетынкаваны. Архітэктурны дэкор выкананы ў тэхніцы цаглянай муроўкі. Размяшчаўся насупраць дома.

Пейзажны парк быў разбіты на плошчы 8 га ўздоўж берагавога схілу возера Мурамшчына. Галоўная алея праходзіла ад дома па грэбні ўзгорка з відам на возера. Усяго ў парку расло 48 парод дрэў. Сярод экзотаў у парку раслі ліпа амерыканская буйналістая, сасна чорная, веймутава, сібірская, явар, каштан конскі. На адной з алей адкрывалася перспектыва на возера Белае і вясковую царкву, размешчаную на другім беразе возера. За паркам быў пладовы сад.

Сядзіба захавалася часткова. З пабудоў ацалелі некалькі гаспадарчых будынкаў. З іх толькі будынак стайні мае статус гісторыка-культурнай каштоўнасці, але ён цяпер не выкарыстоўваецца. Два гістарычныя гаспадарчыя ці службовыя будынкі выкарыстоўваюцца пад жыллё.