Адпраўлена!

Памылка!

Стаянка і селішча Коматава-6 перыяду каменнага, бронзавага вякоў, сярэднявечча, новага часу

Цiкавае

ГКК Коматава-6. Выгляд з паўночнага захаду

Змест

Звесткі аб каштоўнасці

Шыфр

413В000191

Катэгорыя каштоўнасці

аб'екты рэгіянальнага значэння

Глава

Матэрыяльныя нерухомыя каштоўнасці

Тып каштоўнасці

Помнiк археалогii В

Падтып каштоўнасці

Рэшткi старажытных пасяленняў

Месца знаходжання

Гродзенская вобласць, Гродзенскі раён, в. Коматава, насупраць верхняй ускраіны вёскі, 60 м на поўдзень ад Коматава-5

Датаванне

VІІ - VІ тыс. да н. э.

Апісанне

Стаянка і селішча Коматава-6 перыяду каменнага, бронзавага вякоў, сярэднявечча, новага часу знаходзіцца на правабярэжнай надпоймавай тэрасе р. Нёман, на паўднёвы ўсход ад усходняй ускраіны вёскі Коматава і будынка былога магазіна, поўдзень ад царквы, насупраць вясковых могілак. Займае практычна роўную пляцоўку ніжняй тэрасы, часткова засаджанай дрэвамі і маладой лесапасадкай. З паўночнага боку абмежавана невялікім ярам, пасля якога пачынаецца помнік Коматава-5-ГЭС, а таксама валападобнымі штучнымі насыпамі. З заходняга прырэчнага боку помнік абмежаваны краем тэрасы, які раней падмываўся ракой падчас павадкаў.

Помнік быў знойдзены Славяна-літоўскім атрадам Прыбалтыйскай археолага-этнаграфічнай экспедыцыі над кіраўніцтвам Ф.Д. Гурэвіч у другой палове XX ст. Быў выяўлены культурны пласт, у якім трапіліся вугалькі, абпаленыя камяні, крамянёвыя вырабы, фрагменты гладкай і штрыхаванай ляпной керамікі, абломкі ганчарнага посуду. У 1973-1975 г г. стаянку абследаваў Я.Г. Звяруга.

У 2009 г. помнік археалогіі даследаваў В.Л. Лакіза. Большасць з выяўленых аб'ектаў адносіцца да эпохі позняга сярэднявечча і новага часу: разнастайныя гаспадарчыя і слупавыя ямы, рэшткі жылых і гаспадарчых пабудоў з кухнямі, печамі і скляпеннямі, каменнымі выкладкамі і жарнавамі. Знойдзена некалькі тысяч артэфактаў: крамянёвыя знаходкі першаснай апрацоўкі, розныя тыпы крамянёвых прыладаў працы і зброі, фрагменты ляпной керамікі неаліту і бронзавага веку, жалезныя (нажы, крэсіва, пражкі і нш.) і касцяныя вырабы (“жужалкі"), медная манета. Асабліва прадстаўнічымі з’яўляюцца калекцыя ганчарнай керамікі, у тым ліку цэлая пасудзіна, а таксама фрагменты костак, асноўная колькасць якіх выяўлена ў межах кухні жылой пабудовы XVII - XVIII стст.

Атрыманая калекцыя артэфактаў дазваляе датаваць помнік Коматава-6-ГЭС мезалітам (яніславіцкая культура), неалітам (нёманская і культура шнуравой керамікі), бронзавым (тшцінецкая культура) і раннім жалезным вякамі, сярэднявеччам і новым часам (XI -XVIII стст.). Асаблівы росквіт помніка (селішча) прыпадае на XVII - XVIII стст.