Свята-Лукінская царква

Царква пабудавана па кананічнай чатырохчасткавай планіровачнай схеме, якая атрымала надзвычай дынамічную, буйнамаштабную аб'ёмна-прасторавую кампазіцыю. Цыклапічная па вышыні 3-ярусная шатровая званіца ўзносіцца над простым, але высокім і шырокім прамавугольным у плане зрубам бабінца і ўражвае сваёй амаль гатычнай накіраванасцю ў вышыню. Яе верхнія грані дэкарыраваны балюстрадай і паўкалонамі. Кубападобны аб'ём залы завершаны вялікім васьмігранным светлавым барабанам, шацёр якога, як і званіцы, вянчае цыбулепадобная галоўка. Дынаміку архітэктурнай кампазіцыі узмацняюць больш нізкая пяцігранная абсіда і высокі шасціслуповы ганак, завершаны чатырохвугольным франтонам "мадэрновай" трактоўкі. Суровая плоскаснасць ашаляваных фасадаў змягчаецца высока ўзнятымі прамавугольнымі вокнамі ў разных ліштвах. Галоўны ўваход вылучаны высокім шчытом на шасці тонкіх слупах. У інтэр'еры царквы грані раскрытага ў залу барабана і сцены дэкарыраваны паліхромным роспісам.Ветразі барабана падтрымліваюць чатыры спараныя калоны. Апсіда абмежавана разным 3-ярусным іканастасам.