Комплекс складаецца з будынка царквы, пабудаванай на месцы старажытнай, званіцы, будынка нядзельнай школы, гаспадарчых пабудоў. Вакол царквы існуюць старажытныя могілкі.

Царква была пабудавана князем Міхаілам Агінскім у 1794 г. Але ў 1915 г. драўляная царква (першапачатковая, ці рэканструяваная) згарэла. У 1925-1928 г. на месцы старой была пабудавана новая царква, часовая, з дошак. І толькі ў 1991-1994 гг. намаганнямі пратаірэя Мікалая Леўшука і ўсіх сялян пабудавана мураваная царква (па праекце заслужанага архітэктара Беларусі Л.В. Макарэвіча).

Могілкі XVIII ст. (магчыма яшчэ больш раннія) утрымліваюцца сіламі прыхода. Тэрыторыя могілак складае 0,52 га. Тут захаваліся надмагільныя пліты 2-ой паловы XVIII ст., каменныя і жалезныя крыжы. У перыяд Першай сусветнай вайны праз мястэчка праходзіла лінія фронту. На могілках хавалі нямецкіх салдат, якія загінулі ў час вайны.