Царква

Царква размешчана ў цэнтры вёскі Чырвоны Партызан, Ленінскага сельвыканкама.
Пабудавана ў другой палове 19 ст. з дрэва. Храм крыжова-купальны, аднанефавы з
пяціграннай апсідай, накрыты шатровым дахам, у якім прарэзаны люкарны, аздобленныя разьбой. Над сяродкрыжам асноўнага аб’ёму ўзвышаецца невялікі шлемападобны купал на светлавым васьмерыку. Над бабінцам высокая трох’ярусная званніца. Ярусы аддзелены развітымі разнымі карнізамі. Галоўны і бакавыя ўваходы вылучаны ганкамі з казыркамі. Сцены гарызантальна ашаляваны, прарэзаны прамавугольнымі аконнымі праёмамі ў ліштвах з сандрыкамі і дэкаратыўнымі рашоткамі. Царква - помнік драўлянага народнага дойлідства з элементамі псеўдарускага стылю, з шырокім выкарыстаннем разьбы ў дэкоры.