Царква

Царква Святых Пятра і Паўла - архітэктурны помнік рускага рэтраспектыўнага стылю.   Першая святыня ў Празароках згадваецца ў 1523 годзе, хоць цяперашні цагляны будынак храма быў пабудаваны ў 1909-м святаром Міхаілам Заклінскім, пры актыўным удзеле мясцовага памешчыка і каморніка землеўпарадкавальнай камісіі Ігната Буйніцкага. На пабудову царквы ў 1906-1907 гг. з дзяржаўнай казны была выдзелена сума ў 12 370 рублёў. Асвяціў новы храм 31 мая 1909 года архіепіскап Літоўскі і Віленскі владыка Нікандр падчас сваёй паездкі па Дзісенскім павеце. Размяшчаецца святыня на заходняй ускраіне в.Празарокі, гэта частка пасёлка стагоддзе таму ўваходзіла ў маёнтак генерал-маёра Мухіна. У савецкія гады царква не зачынялася і дзейнічае зараз. У ёй захоўваецца абраз святога Мікалая.