Царква Раства Багародзіцы з брамай-званіцай

Двухзрубная пабудова: прамавугольны ў плане асноўны аб'ём з трохграннай алтарнай часткай і бабінец з двух'яруснай званіцай (васьмярык на васьмярыку), завершанай цыбулепадобнай галоўкай. Асноўны аб'ём накрыты двухсхільным дахам з вальмамі над алтарнай часткай. Фасады рытмічна члянёны слупамі-сцяжкамі і паўцыркульнымі аконнымі праёмамі ў простых ліштвах. Мастацка-дэкаратыўны акцэнт інтэр'ера -- драўляны іканастас. Уваход на агароджаны ўчастак царквы праз драўляную двух'ярусную надваротную званіцу, якая размешчана аўтаномна па падоўжнай восі царквы. Канструкцыя званіцы каркасная. Агульныя дэталі дэкору (паўцыркульныя праёмы, шалёўка сцен) аб'ядноўваюць яе з царквой ў адзін архітэктурны ансамбль.