Царква Святой Троіцы

Царква Святой Троіцы - незвычайны храм, які не мае, аналагаў у Беларусі. У 1747 годзе ў вёсцы Вялікая Сваротва па загаду Мікалая Аўсянага, які займаў высокі ўрадавы пост у ВКЛ, на месцы капліцы, якая ўваходзіла у склад Пачапоўскай уніяцкай парафіі, была пабудавана драўляная уніяцкая царква незвычайнай архітэктуры. Храм быў асвечаны ў імя Святой Тройцы.

Царква мела трохвугольны план з уваходамі з трох бакоў. На вуглах былі зроблены сакрысціі, што надавала асноўнаму памяшканню шасцігранную форму плана. Шатровы гонтавы дах завяршаўся невялікай вежай, па вуглах даху стаялі тры маленькія вежачкі. Трохвугольны, аздоблены разьбой і пазалотай, алтар займаў цэнтр залы. Хоры мелі выгляд круглага ў плане балкона з агароджай з балясін, на сценах абразы 12 апосталаў. Столь мела форму скляпення і была размалявана. Падлога была цаглянай.

Трохкутная форма царквы, верагодна, адлюстроўвала імкненне дойлідаў пад час распаўсюджвання ўніяцтва стварыць царкву не падобную да храмаў іншых канфесій.