Троіцкая царква

Царква падоўжна-восевай прасторавай кампазіцыі. Складаецца з асноўнага квадратнага ў плане аб'ёму, прамавугольных аднолькавых па шырыні апсiды i прытвора з бабiнцам. У сілуэце царквы дамініруюць надбудаваная над прытворам двух'ярусная (васьмярык на чацверыку) званіца, завершаная шатровым дахам з макаўкай, і высокі васьмігранны светлавы барабан, накрыты пакатым шатровым дахам з цыбулепадобнай галоўкай на гранёнай шыйцы. Прамавугольная ў плане апсіда накрыта вальмавым дахам, увенчаным макаўкай. Фасадныя сцены царквы ашаляваны. Шалёўка гарызантальная і вертыкальная. Прамавугольныя і на званіцы спічастыя аконныя праёмы аформлены простымі ліштвамі. Галоўны і бакавыя ўваходы вылучаны адкрытымі тамбурамі з навесамі на чатырох калонах. Навесы накрыты двухсхільнымі дахамі, якія ўтвараюць на галоўным фасадзе трохвугольныя франтоны. Унутры малітоўная зала перакрыта васьмігранным шатром на ветразях. Царква - помнiк драўлянага дойлiдства з элементамi псеўдарускага стылю.