Прыбралі ўвесь навадзел. У Мінску адрэстаўрыравалі яшчэ адзін гістарычны будынак

У Мінску завяршыўся капітальны рамонт жылога дома на вуліцы Валадарскага, які мае статус гісторыка-культурнай каштоўнасці. Пабудова 1904 года атрымала другое жыццё, аднак сам працэс абнаўлення апынуўся зусім нетыповым для звычайнага жылога фонду — працы праводзіліся пры абавязковым суправаджэнні навуковага кіраўніка, піша «Мінскбуд».

Галоўнай задачай будаўнікоў было вярнуць будынку яго першапачатковае гістарычнае аблічча. Для гэтага з фасада дэмантавалі ўсе дысануючыя элементы, уключаючы стары казырок і кандыцыянеры. На месцы струхлелага балкона адлілі новы, скрупулёзна аднавілі страчаную ляпніну, дэкаратыўныя цягі паміж першым і другім паверхамі, а таксама прывялі ў парадак пашкоджаную тынкоўку.

Змянілася і тэхнічная "начынне" дома. Стары дах замянілі на сучасны фальцавы з новай кроквеннай сістэмай, цалкам абнавілі абсталяванне цеплапункта, інжынерныя сеткі ў падпольных каналах, газазабеспячэнне, электрашчыткі і вокны ў месцах агульнага карыстання. У саміх кватэрах па стаяках зманціравалі новыя трубы водазабеспячэння і каналізацыі.

Аб'ект на Валадарскага не адзіны ў сваім родзе: раней пасля аналагічнай рэстаўрацыі фасада здалі гістарычны жылы дом на вуліцы Раманаўская Слабада. Усяго ж за 2026 год прадпрыемства мае намер прывесці ў парадак амаль паўмільёна квадратных метраў жылля — з запланаваных 95 дамоў большую частку ўжо паспяхова здалі ў эксплуатацыю.

Аўтар: Анастасія Даніловіч